کیا فرماتے ہیں علمائے دین و مفتیان شرع متین مسئلہ ذیل میں کہ : زید اپنی منکوحہ کو نماز پڑھنے سے روکتا ہے، منع کے باوجود اگر وہ نماز پڑھتی ہے تو لات مارکر گرا دیتا ہے اور مصلیٰ اُٹھا کر لے جاتا ہے اور کہتا ہے کہ یہ ہم پر جادو کرتی ہے اگر وہ قرآن پاک کی تلاوت کرتی ہے تو بھی منع کرتا ہے اور مار پیٹ کرتا ہے ایک مرتبہ تو قرآن پاک چھین کر غیر مسلم کو بلایا کہ تم اس کو لے جاؤ ہمارے گھر میں قرآن پاک نہ رہنا چاہئے“۔ زید کی منکوحہ نے منت و سماجت کر کے قرآن واپس حاصل کیا خود زید مذکور کا عالم یہ ہے کہ شراب پیتا ہے احکام اسلام سے قطعا تعلق نہیں رکھتا ہے۔ زید کی منکوحہ عرصہ تین سال سے میکے میں بیٹھی ہے جب منکوحہ مذکورہ دار القضاء میر تا سٹی میں اپنے والد بدرالدین شاہ کے ہمراہ حاضر ہوئی اور اپنا حلفیہ بیان حاجی غلام محمد انگریز اور اپنے والد اور قاضی صاحب کو دیا تو سابق قاضی شہر جناب قاضی خورشید احمد صاحب عثمانی نے مذکور حلفیہ بیان قلمبند فرما کر بصورت استفتاء حضرات علماء کی خدمت میں مسئلہ شرعی بیان فرمانے کی غرض سے دارالقضاء کی معرفت روانہ کرنا مناسب سمجھا لہذا حضرات علمائے دین سے استدعا ہے کہ مذکورہ حالات اور زید مذکور کی بیوی کے حلفیہ بیان ( کی کاپی جو ساتھ میں ارسال کی جارہی ہے ) کو ملاحظہ فرما کر جواب باصواب سے مطلع فرما کر عنداللہ ماجور ہوں !