زید ایک دولت مند تاجر کا بیٹا ہے اور والد کی تجارت میں ان کا شریک کار۔ زید کا نکاح اس کے والد نے ایک غریب گھرانے کی دوشیزہ سے ۱۹۶۸ء میں بعوض دین مہر مبلغ گیارہ ہزار روپیہ سکہ رائج الوقت کیا اور اس کی رخصتی ۱۹۷۱ء میں ہوئی تب سے وہ زید کے پاس بحسن و خوبی ایک فرمانبردار، وفادار، خدمت گزار بیوی کی طرح رہتی آرہی ہے۔ زید کو یا اس کے والدین کو اس سے کوئی شکایت نہیں ہے۔ زید اچانک شکم کے کینسر کا شکار ہو گیا اور چھ ماہ بعد بیچنے کی کوئی امید نہیں ۔ اپنے باپ کی حیثیت کے پیش نظر زید اپنی تیمارداری میں منہمک بیوی سے اپنے دین مہر کی معافی کے لئے نہیں کہتا ہے۔ کیا زید کے گزرجانے پر مہر کی ادائیگی واجب ہو جائے گی ؟ اگر زید کے والد نہ ادا کریں اور بیوہ کومہر معاف کرنے پر مجبور کریں تو اس سے زید کے نکاح کی صحت پر کیا اثر پڑے گا؟ اور کیا اسلام میں علی الاعلان نکاح کے بعد بقیہ شرط کی پورتی کے بغیر عورت مصرف میں لائی جاسکتی ہے؟ خصوصاً نکاح کے وقت جو دین مہر مقرر ہوتا ہے وہ اس لئے ہوتا ہے کہ موقع پڑنے پر جبراً بھی معاف کرالیا جائے کیا زید سے شادی کرنے پر والدین نے بہو کو جو سونا چاندی زیورات دئے تھے زید کے مرجانے پر وہ اسے بھی بیوہ سے کسی بھی حیلہ سے واپس لے سکتے ہیں یا نہیں؟ کیا جائیداد کی وراثت میں بھی بیوہ کا کوئی حق نکاح کی بنیاد پر قائم ہوتا ہے؟ جبکہ زید کو ابھی بیوہ سے کوئی اولاد نہیں یا زید کے اپنے والد کے سامنے ہی گزر جانے سے بیوہ کا حق زوجیت مجوب ہو جاتا ہے یا نہیں؟ دراصل زید کے والدین اس کی بیوی کو کچھ بھی دینا نہیں چاہتے اور جو زیورات اس کو بیٹے کی زوجیت میں آنے پر دئے تھے ، زید کے مرنے پر اس سے واپس لے کر ہڑپ لینا چاہتے ہیں۔ کیا ایسا کرنے میں وہ حق بجانب ہوں گے؟ کیا اسلام نے شادی کا مقصد یہی مقرر کیا ہے کہ عورت کو اس سے عقد نکاح کے وقت دین مہر ، نان ونفقہ، زیورات و جائداد کی لالچ دے کر اپنے مصرف میں لایا جائے اور جب بیوہ ہو جائے تو اس کے ہاتھ کچھ بھی نہ آئے ؟ مفصل طور پر اس مسئلے کی وضاحت کسی سفید ورق میں فرما ئیں اور جواب والے پرچے کو یہاں پہنچنے کے پتے پر روانہ کر دیں۔ المستفتی : نجم الہدی ، تاجپور