۲۹ رمضان المبارک ۱۴۰۶ھ کو قصبہ سہسوان میں مطلع صاف ہونے پر بھی چاند نظر نہیں آیا۔ رات کا کچھ حصہ گزرا تھا کہ کچھ لوگوں نے آکر مسجد میں بتایا کہ آپ اعلان کریں ، اس لئے کہ ریڈیو میں یہ خبر آئی ہے کہ کل صبح دہلی میں عید کی نماز ہوگی ۔ امام مسجد نے مسئلہ بتایا کہ ریڈیو کی خبر شریعت میں معتبر نہیں ، شہادت لے آؤ، اتنے میں وہ لوگ واپس گئے پھر دوسری جماعت آئی اور انہوں نے بتایا کہ مولوی نظر الحسن غیر مقلد نے چاند کی خبر معتبر سمجھ کر چاند ہونے کا ۲۹ رمضان میں ہی اعلان کر دیا ہے۔لہذا کوئی صورت نکالی جائے، لوگوں کا مشورہ یہ ہوا کہ بدایوں بریلی کا پتہ لگایا جائے کہ چاند ہوا ہے یا نہیں؟ پھر رات کو ایک بجے بدایوں دو آدمی با شرع گئے اور وہاں جا کر دیکھا تو معلوم ہوا کہ یہاں شرعی شہادت گزر چکی ہے اور دوذمہ دار مفتیوں نے عید ہونے کا اعلان کر دیا۔ اب ان دونوں شہادت مانگی تو دونوں مفتیوں نے کہا کہ ہم شہادت دیتے ہیں کہ میرے پاس شہادت گزری ہے لہا تم لوگوں کے لئے یہ علی الشہادت ہے، وہاں سے سہسوان واپس آیا اور مفتی سہسوان کو بتایا کہ ہم دو آدمی بدایوں سے شہادت لے کر آئے ہیں، اب کیا کرنا چاہیے ؟ مولانا نے صاف لفظوں میں اجازت دی کہ اعلان کراؤ پھر دونوں شاہد نے کہا کہ اس کے ذمہ دار آپ ہیں، مولانا نے پھر یہ ہی کہا کہ بس ذمہ دار ہوں مولانا کی اجازت پر اعلان کرایا گیا جس سے لوگوں نے اختلاف کیا کہ یہ شہادت نہیں ، خبر ہے۔ اس پر امام عیدگاہ نے بھی اختلاف کیا اور امام عیدگاہ نے شہادت تسلیم نہیں کی اور نماز بھی نہیں پڑھائی ۔ کچھ لوگوں نے رمضان کا ۲۹ کا چاند تسلیم کیا اور شہادت شرعی تسلیم کر کے عید کی نماز ادا کی اور کچھ لوگوں نے ۳۰ / رمضان پورے کیے اور ایک روزہ کو قضا سمجھا۔ آیا اب ۲۹ / رمضان المبارک والے کی عید کی نماز ہوئی یا نہیں؟ اور شہادت معتبر ہوگی یا نہیں؟ کیا ایک روزہ کی قضا رکھنا لازم ہے؟ اور ۳۰ / رمضان پورے کرنے والے کے لئے کیا حکم ہے؟ جبکہ ۲۹ / رمضان والے یکم شوال سمجھ کر اس دن کے روزے کو حرام سمجھتے ہیں۔ خلاصہ تحریر فرمائیں! المستفتی: جناب محمد ظفر السعيد صاحب قصبہ سہسوان ضلع بدایوں شریف (یوپی)