کیا فرماتے ہیں علمائے دین و مفتیان شرع متین اس مسئلہ میں کہ: ایک ہی مسجد میں دوبارہ نماز جمعہ وعیدین ہوسکتی ہے؟ جبکہ جماعت کثیر ہواور مسجد سے باہر بارش و دھوپ کی شدت کی وجہ سے صف کا انتظام کرنا دشوار ہو، ایک عالم نے فرمایا کہ ایک مسجد میں دوبارہ نماز جمعہ ہو سکتی ہے جبکہ امام محراب میں کھڑا نہ ہو اور اذان نہ کہی جائے حوالہ میں بہار شریعت حصہ سوم ص ۱۳۰ کی درج ذیل عبارت کو پیش کرتے ہیں۔ اگر بے اذان جماعت ثانیہ ہوئی تو حرج نہیں جبکہ محراب سے ہٹ کر ہو اور اسی کی روشنی میں جمعتہ الوداع کی نماز دوبارہ ہوئی عالم مذکور سے جب ایک صاحب نے دریافت کیا اور بتایا کہ بہار شریعت کی اس عبارت پر نماز جمعہ کو قیاس کرنا درست نہیں ہے تو انہوں نے جواب دیا کہ میں نے یہاں کے حالات کے پیش نظر ایسا کیا اگر دوبارہ جماعت کی اجازت نہ دی جاتی تو فساد ہو جا تا۔اس لئے لڑائی جھگڑا سے بچنے کیلئے میں نے ایسا کیا جبکہ اسی مسجد کے انتظامیہ کمیٹی کے صدرو سکریٹری نے بتایا کہ فتنہ و فساد کا کوئی اندیشہ نہیں تھا ہم نے ان سے مشورہ لیا اور انہوں نے جواز کی صورت پیش کی اور حوالہ بھی دکھایا لہذا ہم لوگوں نے دوسری جماعت کا اعلان کیا۔ کیا عالم مذکور کا یہ فعل درست تھا ؟ اگر نہیں تو جب لوگوں نے دوبارہ نماز جمعہ ادا کی ان کی نماز کا کیا ہوگا؟ المستفتی محمد انیس الرحمن معرفت نورانی بک ڈپوری ۱۴ ڈی مارکیٹ بردوان بنگال